Э дыбысы
16. Мәтінді оқы.
ЭКСПО – бүкіләлемдік көрме. Ол ең алғаш Ұлыбританияда өткен.
ЭКСПО-2017 көрмесін Астанада өткізу – Қазақстанның ірі жобаларының бірі. Бұл ТМД елдерінде өткен алғашқы көрме болды.
Көрменің тақырыбы «Болашақтың энергиясы» деп аталды. Көрменің аумағында күн сайын әр алуан іс-шаралар өткізілді.
Оның бәрі эфирден көрсетілді.
• Мәтін не туралы?
• Сұрақтарға жазбаша жауап бер:
1. ЭКСПО неліктен бүкіләлемдік көрме деп аталды?
2. ЭКСПО-2017 көрмесі қайда өтті?
3. Көрменің тақырыбы қалай аталды?
• Мәтіннен э дыбысы бар сөздерді тауып жаз. Бұл сөздердің мағынасын дереккөздерден қарап біліп ал.
• «Болашақтың энергиясы» тақырыбында болжам жаса және топта талқыла.
Э – дауысты дыбыс. Ол басқа тілден енген сөздерде және сөздің басында кездеседі: эфир, эскалатор, экипаж.
17. Берілген сөздерді қатесіз көшіріп жаз.
Эрмитаж, эстрада, экскаватор, эстафета.
• Өзің э дыбысы бар бірнеше мысал айт. Сол сөздердегі э дыбысын е дыбысы бар сөздермен салыстыр.
18. Көп нүктенің орнына э, е әріптерінің тиістісін қойып, сөйлемдерді көшіріп жаз.
1. Көшеде …лектр шамы жарқырайды. 2. Ұшақ …кипажсыз орнынан қозғалмайды. 3. Балаларға …стафета ойнау қызық болды.
• Э дыбысы бар сөздердің мағынасын түсіндір. Осы сөздерге дыбыстық талдау жаса.
19. «Шынықсаң, шымыр боласың» эстафета жарысына құттықтау сөз дайында.
Ол үшін келесі беттегі сурет пен сызбаны пайдалан.
• Құттықтау сөзі шығу үшін, шар ұстаушылардың орнын қалай өзгерткен дұрыс?
• Шарлардағы сөздерді пайдаланып, мына сызбаны толықтыр.
