Тұңғыш ғарышкер
1. 2-сыныпта оқығаныңды есіңе түсір. Суретке қарап, сөйле.
2. Өлеңді түсініп оқы.
Тоқтар батыр
Айналады ел бір сенен,
Есіміңді білсе әлем.
Ғарышқа ұшқан қазақтың
Тұңғышына мың сәлем.
Тоқтамайды осы аңыз,
Біз жолыңды тосамыз.
Тоқтар батыр ерлігін
Күнде өлеңге қосамыз.
Ерлік пенен жыр егіз,
Оны жастан білеміз.
Біз Тоқтардың есімін
Ту ғып ұстап жүреміз.
Тұманбай Молдағалиев
Орфографиялық Сөздік
ғарышкер
зымыран
сауалнама
сұхбат
3. Өлеңді жаттап ал.
4. Өлеңді тыңда.
Ұшты зымыран аспанға
Көшемізде көп бала
Жиналады топтала.
Соқпайды олар аққала,
Жүгірмейді доп қаға.
Ойнамайды «соғысты»,
Ұнатпайды бұл істі.
Баяғыдай асықты
Атудан да қашыпты.
Енді олардың өнері –
Зымыранның моделі.
Бірі қазып үңгірді,
Орнатар мықты тұғырды.
Қояды оған төндіріп,
Зымыранын қондырып.
Енді бірі газ беріп,
Басқасы қарар мәз болып.
Шүріппені бірі басқанда,
Ұшты зымыран аспанға…
…Ғарышты құшар кез келіп,
Ойын да кетті өзгеріп.
Бүркіт Ысқақов
Зымыран – ғарыш кемесі.
Моделі – бейнесі, үлгісі.
Ғарыш – ауасыз кеңістік, аспан әлемі.
5. Ойларыңды тақырыпқа сай жүйелеп айтыңдар.
1-топ. Ғарышкер болу үшін …
2-топ. Ғарышкер болсам …
6. Егер журналист болсаң, қазақтың тұңғыш ғарышкері Тоқтар
Әубәкіровтен сұхбат алу үшін қандай сұрақтар қояр едің?
Сауалнама – берілген сұрақтарға жауап беру арқылы ақпарат жинау.
7. «Ғарышкер» атты 5 жол өлең құрастыр.