Жаңбыр
1. Жаңбырға қатысты 5 сөз ойластырыңдар.
2. Мәтінді тыңда.
Жаңбыр жауды
Жаңбыр жауды себелеп,
Жасырынды көбелек.
Аспан кетті күркіреп,
Бұл не деген керемет?!
Тау мүлгіді жаңғырған,
Қорыққандай жаңбырдан.
Бара жатыр қара бұлт,
Көк аспанда қаңғырған.
Бұлттан түсті моншақтар,
Гүлге қонған мол шықтар.
Алақайлап жүгірдік,
Қандай қызық сол шақтар!
Нұрсұлтан Әлімқұлов
Орфографиялық Сөздік
жаңбыр
нөсер
Нөсер
Іркес-тіркес ығысқан
Бұлттар үлкен аймақты ап,
Шыға келді шығыстан
Ақ тайлақтай ойнақтап.
Түйіліп кеп қабағы,
Қаптап алды аспанды.
Сатырлатып даланы
Аппақ нөсер басталды.
Үй үстінен аунады,
Тамшы жерге секірді.
Менің апам ауланы
Жуып жүрген секілді.
Су дегенің шүмектеп,
Сорғалайды тамшылап.
Шыбық атты біз ерттеп,
Шауып кеттік қамшылап.
Шаңын жуды лезде
Діріл қаққан жапырақ.
Ойдым жерде бір кезде
Көлшік тұрды жалтырап.
Адырбек Сопыбеков
Орфографиялық Сөздік
жаңбыр
нөсер
3. Екі өлеңді салыстыр. Өлең жолдарын тауып оқы.
4. Өлең жолдарын қарасөзге айналдырып жаз.
5. Құраған сөйлемдерді пайдаланып, «Жаңбыр жауды» атты мәтін құрастыр.