Достығымыз жарасқан
1-тапсырма. Тыңдау және талқылау.
Жан досым
Өлеңін жазған: Т. Молдағалиев
Әнін жазған: С. Бәйтереков
Iздеген де табылатын қасымнан,
Көңiлi бар қызғалдақтай ашылған.
Көріспесек, сағыныштан жүдейтiн,
Кiм бар жақын бала күнгi досымнан?
Қайырмасы:
Жан досым, үстем болсын мерейiң,
Әрқашан жеңiсiңдi көрейiн.
Сырымыз да бiтпесiн,
Жырымыз да бiтпесiн,
Жырымыз да бiтпесiн.
• Композитор С. Бәйтерековтің «Жан досым» әнін тыңда, сөзіне назар аудар.
• Ән қалай орындалады (лирикалы, ойнақы, жігерлі, жылдам, баяу)?
• Неліктен ән «Жан досым» деп аталған?
• Өзіңнің досың туралы әңгімеле (досыңның мінезі, жақсы қасиеті).
• Дос ұғымына тән құндылықтарды атап, толықтыр (адал, …).
• Өзге ұлт өкілдерінен достарың бар ма?
2-тапсырма. Орындау.
Достар әні
Өлеңін жазған: А. Рахметов
Әнін жазған: Н. Мирманов
Доспыз бәріміз,
Бірге әніміз.
Татулықпен ойнап-күліп,
Жайнар жанымыз.
Келер күндерге,
Терер гүлдерге,
Достарменен не жетеді,
Бірге жүргенге.
Қайырмасы:
Дос – өмірдің бағы,
Сынб асын сағы,
Арайлап атсын ақ таңы.
Дос – көңілдің күйі,
Тәңірдің сыйы,
Кездессем деймін мен жиі.
• «Достар» әнінің сөзін әуенімен үйрен.
• Әндегі достар бойындағы құнды қасиеттерді ата.
• Әннің орындалу ерекшеліктерін сипатта (темпі, көңіл күйі: лирикалық ән, би сипатына жақын, марш ырғағында).
3-тапсырма. Шығармашылық жұмыс.
1. Екі топқа бөлініп, әннің бірінші шумағын төмендегідей талаптарға сәйкес орындаңдар:
1-топ: әннің бірінші, үшінші жолдарын фортеде орындайды.
2-топ: әннің екінші, төртінші жолдарын пианомен орындайды.
2. Өткен сабақтардан динамикалық таңбаларды есіңе түсір: f (форте) – қатты орындау, p (пиано) – жай орындау.
4-тапсырма. Таныстыру.
Шығармашылық жұмыстарыңды таныстырыңдар және бағалаңдар.