Орман – Жер көркі
Кейіпкерді түрлі әдіспен бейнелеймін.
1. Шешуін тап.
1. Қорбаң, қорбаң етеді,
Орман – оның мекені.
Тәтті балға тойып ап,
Қыста ұйқыға кетеді.
2. Секең, секең етеді,
Орман – оның мекені.
Отырғанда шоқиып,
Құманға ұқсап кетеді.
3. Көп, көп ине,
Бір сабағы жоқ ине,
Іс тікпейді әрине.
4. Шырша саясы – күркесі,
Өзі – орман еркесі.
Қарғып жүрер жан-жаққа
Өте құмар жаңғаққа.
• Орманда тағы нелер мекендейді? Қимылмен, дыбыспен бейнелеп, жұмбақтап көр.
2. Мұқият тыңда.
Орман
Орман – қырдың, ойдың да
Әсем бағы, Жер көркі.
Жыл он екі ай бойында
Жайнап тұрар біркелкі.
Қыста да әсем орманда –
Соғар боран, бұрқасын
Ақ мамыққа орарда
Әрбір бұтақ, бұтасын.
Орман әсем көктемде –
Жайнап жасыл желектер,
Гүлдер шағы жеткенде
Ұшқат, мойыл, жидектер.
Орман әсем жазда да –
Маужырап бір балқиды,
Ауада ыстық, таза да
Шайыр иісі аңқиды.
Орман әсем күзде ерек –
Жерге алтындай жарқырап,
Бұтағынан көк терек
Төгіледі жапырақ.
Қып-қызыл боп бүргеннің
Жемісі әбден піседі,
Күзгі орманда жүргеннің
Ынтығы арта түседі.
Орман – қырдың, ойдың да
Әсем бағы, Жер көркі.
Жыл он екі ай бойында
Жайнап тұрар біркелкі.
Ермек Өтетілеуұлы
3. Автор туралы әңгімеле.
Ермек Өтетілеуұлы
1938–2006
- Ақмола қаласында туған.
- Ақын, аудармашы.
- «Балаларға жазу – бұл әрі жеңіл, әрі қиын шаруа. Бірақ, бастысы – қуанышты іс».
Ермек Өтетілеуұлы
4. «Жыл он екі ай бойында Жайнап тұрар біркелкі» деген жолдағы ақын ойын өрбітіп әңгімелеңдер. Сөйлеуде көркемсөздерді (эпитет, кейіптеу т.б.) қолданыңдар.
- Қысқы орман
- Күзгі орман
- Жазғы орман
5. «Орман – Жер көркі» тақырыбына эссе жаз (8–10 сөйлем).