Түбір мен қосымшаның жазылуы
36. Өлеңді тыңда.
Түн
Ұясына күн батып,
Айналаны түн басты.
Дала мүлгіп балбырап,
Жым-жырттыққа ұласты.
Біз де үйге беттедік,
Енді әткеншек теппедік.
Ойнасақ та күнұзақ,
Құмарына жетпедік.
Түнде тыныс аламыз,
Тез-ақ ұйықтап қаламыз.
Жалғасына ойынның
Түсімізде барамыз.
Рахат Наурызбаева
• Өлең неліктен «Түн» деп аталған?
• Балалардың түнде әткеншек теппеу себебі неде?
• Түнгі мезгілді күндізгі уақытпен салыстыр.
Орфографиялық Сөздік
күнұзақ
37. Мәтінді қатесіз әрі көркем жаз.
Күндіз күн шығады. Ол айналаға нұрын шашады. Жер беті жап-жарық болады.
38. Пішіндерді сәйкестендіріп, өлең құрап жаз.
• Жазған өлеңдегі қарамен берілген сөздің түбірін тап.
• Түбір сөздің соңғы дыбысы неліктен өзгергенін түсіндір.
39. Ребусты шеш.
40. Өлеңді тыңда.
Жеті жасар баласын
Жетпісте шал жетектеп,
«Қайда әлгі мектеп?» – деп,
Жетпіс келеді сүрініп,
Жеті келеді жүгіріп.
– Балам, балам, жақсы бол,
Міне, сенің мектебің.
Сабағыңа зейін сал,
Ақылды бол тентегім, –
Деп, жетпіс бір күрсінді.
Жеті нені түсінді?..
Қасым Аманжолов
• Жетпістегі ата неге күрсінді деп ойлайсың? Оның неге күрсінгенін бала түсінді ме? Өз ойыңмен бөліс.
• Қарамен жазылған сөздердің түбірін тап. Түбір сөздің жазылуындағы өзгерістің себебін түсіндір.
41. Сөздерді көшіріп жаз.
Халық – халқы, ерік – еркі, құлып – құлпы, орын – орны, бөрік – бөркі.
• Сөздерді салыстыр. Түбір сөздің жазылуын өзгерткен қосымшаны ата.
• Сөздердің жазылуын есте сақта.
42. Тізбектің басында тұратын сөзді тап.
• Түбір сөздерді қатыстырып сөйлем құра.
43. Сөйлемдерді мәтін шығатындай ретпен жаз.
Одан қалып қоюға болмайды. Уақыт тоқтамай сырғиды. Сондықтан бүгін істейтін істі ертеңге қалдырма.
• Жазған мәтін мазмұнына өз ойыңды айт.
• «Уақыт құнды», «Уақытыңды бағала» деп неліктен айтатынын топта талқыла.