Әр алуан тапсырмалар
I. Тесті орында:
1. Қазақстан Ғылым академиясының бірінші президенті болып сайланды:
А) К. Жұбанов;
Ә) Қ. Сәтбаев;
Б) Е. Бекмаханов.
2. Туған өлкенің тарихын баяндайтын мұражайы:
А) геологиялық;
Ә) әдеби;
Б) тарихи-өлкетану.
3. Теміржолшылар күнін қандай мамандық иелері атап өтеді:
А) жүргізуші;
Ә) машинист;
Б) ұшқыш.
II. Тарихи мәліметтерді салыстыр
Біздің бабаларымыз – сақтар, ғұндар мен түркілер Қазақстан аумағында әртүрлі тарихи кезеңдерде өмір сүрген. Олардың өмір салты мен киімдеріндегі ұқсастықтарды сен қалай түсіндірер едің?
III. Заттар мен ұғымдарды салыстыр
Кестенің бірінші бағанына материалдық мәдениетке қатысты, ал екінші бағанға рухани мәдениетке қатысты заттар мен ұғымдарды орналастыр: қыш ыдыс, аңыз, темір қылыш, тас кетпен, жылнамалар жинағы, компьютер, «Қыз Жібек» операсы, кесене, халықтық дәстүрлер мен ғұрыптар, «Амангелді» кинофильмі, «Қалқаман – Мамыр» балеті, халық биі, әйелдердің білезігі.
Қазақстанның пайдалы қазбалары
Тапсырманы ауызша орында.
IV. Картамен жұмыс
Қазақстанның пайдалы қазбалар картасынан (61-бет) көмір, мұнай, темір, мыс, хром кендерін өндіретін жерлерде пайда болған қалаларды тап. Ол қалалар қалай аталады?
V. Мәтінді оқы
Қазақстанда медицина қызметкерлерінің күні жыл сайын маусым айының үшінші жексенбісінде аталып өтеді. Бұл мереке дәл осы күні Ресейде, Беларусь пен Украинада да тойланады.
Медицина қызметкерлерін құттықтау дәстүрі 1980 жылғы «Мерекелік және атаулы күндер туралы» жарлыққа сәйкес кеңестік кезеңде белгіленген.
Дәрігер – әлемдегі ең көне мамандықтардың бірі. Біздің әрқайсысымыз өмірімізде бір рет болса да емделу үшін дәрігерге қаралғанбыз. Тіпті адам өмірге келген сәттің өзінде дәрігерлердің көмегіне сүйенеді. Біз қиын жағдайларға душар болғанда көмек қолын созып, денсаулығымыз бен өмірімізді қорғайтын дәрігерлерге алғыс айтамыз.
Сұрақтарға жауап бер:
1. Медицина қызметкерлерінің күні неге әртүрлі елдерде бір күнде аталып өтіледі?
2. Қай күні дәрігерлер өздерінің кәсіби мерекесін атап өтеді?