МЕНІҢ МЕКТЕБІМ
Біздің сынып
1. Жұмбақтарды шеш.
1. Білім мен тәлім
Парақтап ашқанда,
Беттерінен мәлім.
2. Ілулі тұр кең алаң,
Керегімді мен одан
Жазып алам көшіріп,
Сүртем сосын өшіріп.
3. Жұқа тақтай бөлшегі –
Ұзындықтың өлшемі.
2. Түсініп оқы.
Сапар мен парта
(Мысал)
Бір күні мен
Сыныпқа кіріп ем.
Сапарға көзін аларта
Көтерді басын бір парта.
Жан-жағына қарап қойып,
Ернін кезек жалап қойып,
Сөйлеп кетті асырмастан
Болған істі жасырмастан:
– Есіктен күзде аттап едім,
Онда өзім аппақ едім.
Сапар келіп жайғасты.
Содан бірер ай да асты;
Кітабын, басқа керегін,
Кеткенше сақтап беремін.
Сонда да тыныш қоймады,
Бетімді сызып ойнады.
«Сапар» деп жазды өз атын,
Болдым әбден тозатын.
Айта берсем – масқара-ақ,
Дәл желкемнен ұстап ап,
Есіктен төрге сүйретті,
Сүйегімді күйретті…
***
Сөйлемей парта көп артық,
Қарады көзін алартып.
Үнсіз қалды Сапар да
Сол жерде мұрнын бір тартып.
Адырбек Сопыбеков
3. Мысалдың авторын ата. Сызбаны пайдаланып әңгімеле.
