Өсімдіктер мен жануарлардың адам өміріндегі рөлі
Адам баласы ерте заманнан-ақ өзін айнала қоршаған табиғат дүниелерін қорек ете білді. Олар: су, ауа, орман, шөптер, аңдар, құстар, жануарлар. Адам да табиғаттың бір бөлшегі. Олар табиғаттың берген сыйын ғана пайдаланып өмір сүрді.
«Ежелгі адамдар» тақырыбын естеріңе түсіріңдер.
Уақыт өте келе адамдар мәдени өсімдіктерді өсіре бастады. Жабайы жануарларды қолға үйретті. Адамдар табиғаттың қаталдығына тәуелді болудан арыла бастады.
Сызбаны қараңдар: «Табиғаттан біз не аламыз?»
Қорытынды жасайық. Адамдарға қажетті тағамдарды біз өсімдіктер мен жануарлардан аламыз. Адамдарға күнделікті тұрмыста қолданатын дүниелер қажет болды. Оларды жасау үшін материалды табиғаттан алды. Адамдар өз ағзасына пайдасы бар өсімдіктерді ажырата бастады. Демек, адам табиғатсыз өмір сүруі мүмкін емес!
Бүгін біз айналамыздағы табиғат жағдайларын бақылап көрейік. Табиғаттан біз не аламыз?
Тапсырмаларды орындаңдар. Әр топ өздеріне берілген тапсырмадан айналасындағы табиғат жағдайының (+) қолайлы, (–) қолайсыз жақтарын анықтаулары қажет.
1-топ: Карта және мәтін бойынша жергілікті жердегі су ресурстарын тауып, анықтаңдар.
2-топ: Сурет және мәтін бойынша жергілікті жердегі климаттың ерекшелігін түсіндіріңдер.
3-топ: Сурет және мәтін бойынша жергілікті жердегі өсімдіктер дүниесінің қайсысы мәдени және жабайы өсімдіктер екенін атап, анықтаңдар.
4-топ: Сурет және мәтін бойынша жергілікті жердегі жануарлар дүниесінен жабайы және үй жануарларын анықтаңдар.
1. Мына сөйлемді қалай түсінуге болады? «Табиғат адамды қоректендіреді, емдейді және киіндіреді».
2. Адамдар табиғатты не үшін сақтап, қорғауы керек?