НӘТИЖЕ САБАҚ
1. Сұрақтарға жауап бер.
1) Суретте берілген тұлғалардың қазақ тарихы мен мәдениетінде алар орны қандай?
2) Оларды не байланыстырады?
3) Бұл тұлғалар туралы не білесің?
2. Мәтінді оқы. Термин сөздерді жазып, мағынасын анықта.
Тәуелсіздіктің теңдессіз жеті табысы
Тәуелсіздіктің табыстары:
Бірінші, әлем картасында болмаған мемлекет – Тәуелсіз Қазақстан құрылды. Мемлекеттік шегарамыз халықаралық деңгейде бекітілді.
Екінші, жетекші халықаралық сарапшылардың пікірі бойынша, еліміз әлемге Қазақстанның «Экономикалық ғажайыбының» жарқын үлгісін көрсетті.Атап айтар болсақ:
– Дүниежүзілік банктің «Doing Business» рейтінгі бойынша Қазақстан 1 жылда 51-орыннан 35-орынға жылжыды.
– Әлемдік энергетика саласындағы соңғы 50 жылда болған оқиғаның бірі – Қашаған мұнай және газ кенішінің іске қосылуы.
Үшінші, «Мен қазақстандықпын, бұл менің елім, мен мұнда бақытымды таптым!» – деп айта алатын әділетті қоғамды орнатты.
Төртінші, Нұр-Сұлтан қаласы планетамызда ХХІ ғасырда пайда болған бірінші астаналық қала болды.
Бесінші, экономикалық ғажайыптың арқасында қазақстандықтардың әл-ауқаты жақсарды.
Алтыншы, бүгінде Армения, Беларусь, Қырғызстан және Ресеймен бірге Еуразиялық экономикалық одаққа қатысуда.
Жетінші, бүгінде әлемдік жетекші саясаткерлер мен халықаралық сарапшылар Қазақстанды жаһандық антиядролық қозғалыстың көшбасшысы және жүйелі бітімгерші ретінде мойындайды.
Н. Назарбаев
3. 1-тапсырмада берілген суреттегі тарихи тұлғалар мен оқылым мәтінін байланыстырып, ойларыңды жүйелі түрде жеткізіңдер.
4. Төмендегі шешендік сөздің көркемдік ерекшелігіне мән беріңдер. Өздерің қандай төрелік айтар едіңдер? Тапқырлықтарыңды танытыңдар.
Жаңа жайлауға қоныстанған бір бай екі кедей жігітке құдық қаздырады. Құдық қазылып біткен соң, жігіттер байдан ақысын сұрайды. Бай олардың біреуіне саулық, екінішісіне қозы береді. Екінші жігіт оған наразы болады. Төле биге келіп, шағым айтады. Төле би байға құдық қазған екі адамның еңбегі бірдей екенін айтады. Бірақ құдық иесі өз дегенінен қайтпайды.
Сонда Төле би:
– Адамның екі көзінің, екі қолының қайсысы кем? – дейді байға.
– Ешқайсысының кемдігі жоқ. Екеуі бірдей. Сөзіңізге жығылдым, биеке! Өкпелі жігітке қой берейін, – депті амалы құрыған бай.
«Қазақ өнерінің антологиясы» кітабынан
5. Төмендегі тіл туралы пікірлердің тыныс белгілерін дұрыс қойып, мәнерлеп оқы.
Қазақ тілінің арғы атасы көне түркі тілі (Ш. Уәлиханов).
Балаға қай тілде білім берсең түбі сол ұлтқа қызмет етеді (М. Шоқай).
Анық түрік затты халық тілі біздің қазақ тілі (Ә. Бөкейхан).
Тіл адамның адамдық белгісінің зоры жұмсайтын қаруының бірі (А. Байтұрсынұлы).
Тіл адам жанының тілмашы тілі кем болса адамның қор болғаны (М. Жұмабаев).
Тіл ішкі сырды сыртқа шығаратын құрал (Ж. Аймауытов).
Тіл тазалығы үшін күрес ешқашан толастамайтын мәңгілік күрес (Б. Момышұлы).
Тілден биік асқар тау тілден асқан байлық тілден терең теңіз жоқ (Ғ. Мүсірепов).
6. «Қазақстанның болашағы – білімді жастарда» тақырыбында ойталқы өткізіңдер.
7. Жағдаяттық тапсырма. Теледидардан көрсетілетін «Егер мен президент болсам...» ток-шоу бағдарламасына қатысуға шақырылдың. Не айтасың?
8. «Ұлы даланың өткені мен бүгіні» тақырыбында коллаж жасаңдар. Оны сынып алдында қорғаңдар. Сынып ең үздік жобаны анықтасын.
9. «Шығу парағын» пайдаланып, сұрақтарға жауап бер.
1) «Қазақстан бүгінгі әлемде: Қазақстанның өткені мен келешегі»тақырыбы бойынша не білдің?
2) Өзің үшін қандай маңызды мәліметтер болды?