Натюрморт композициясы. Композициядағы қатарлар
1. Натюрморт дегеніміз не? Есіңе түсір.
2. Натюрмортта не бейнеленеді?
Натюрморттағы заттарды қалай дұрыс орналастыруға болатынына тәжірибе жасап көрейік.
1-композиция. Үш зат бір қатарда тізіліп тұр. Мұндай композиция қызығушылық тудырмайды. Өйткені заттар тапжылмай тұрғандай әсер қалдырады
2-композиция. Бір затты алдыңғы қатарға орналастырамыз. Басқаларын ары қарай, яғни артқы қатарға жылжытамыз. Енді қарашы, қағаз жиегінен әртүрлі қашықтықта орналасқан заттар тереңдікті көрсетеді. Заттар алдыңғы және артқы қатарда орналасады. Мұндай композицияны көпқатарлы деп атайды.
Екінші композиция біріншіге қарағанда жақсы шыққан. Алайда ондағы заттар бір-бірінен алшақ тұр. Олардың арасында натюрмортта маңызды болып саналатын өзара байланыс жоқ. Натюрморт белгілі бір заттардың бейнесі ғана емес, ол заттардың арасындағы байланысты да көрсетеді. Сәтті шыққан натюрм- орттарда заттар бір-бірімен әңгіме-дүкен құрып тұрғандай әсер қалдырады.
3-композиция. Үш зат жарасып тұра қалған. Үлкен әрі мейірімді шайнек өзінен кіші достары – кесе мен тәрелкені «қорғап» тұрғандай. Кесе өзін жайлы сезініп, ал тәрелке достарына «тығылып» тұр. Алдыңғы қатардағы кесе шайнек пен тәрелкені аздап көлегейлеп тұрғанына назар аудар . Алдыңғы қатардағы заттар артқы қатардағыларды көлегейлейді. Біздің жасаған тәжірибеміз натюрморттағы заттарды бір-бірінен алысырақ қойып, оларды қызықты топқа біріктірген дұрыс екенін көрсетті.
№1 жұмыс дәптерінің 8–11-беттеріндегі тапсырмаларды орында.