Түркістан – қасиетті қала
Қажетті деректер жинаймын, оны таныстырылым (презентация) ретінде ұсынамын.
1. Суреттегі қала туралы 5 дерек келтір.
2. Түсініп оқы.
Түркістан
Көргенмін сені
Ғасырлар терезесінен.
Тағлымыңды танып,
Тарихтың шежіресінен.
Көгілдір күмбездерің бой таластырғандай,
Кеудесі көк тіреген хандардың дәрежесімен.
Көкірегіне сыр түйіп, байтақ армандай,
Ғұлама жылдар бастарын шайқар ормандай.
Қасиетті Тайқазан қайта келген соң,
Қазағымның құты да қайта оралғандай.
Ынтығып, неге ұмтылар саған мұнша адам,
Қаншама ақын жыр арнап, қалам жұмсаған?
«Ұлылық деген не?» десе, көрсетем сені,
«Қасиет деген не?» десе, қараймын саған!
Ұлықбек Есдәулет
3. Автор туралы әңгімеле.
Ұлықбек Есдәулет
1954 ж.т.
- Шығыс Қазақстан облысы Зайсан ауданы Үлкен Қаратал ауылында туған.
- Ақын, аудармашы.
- Халықаралық «Алаш» әдеби сыйлығының иегері.
4. Өлеңнен эпитетті тауып, теріп жаз. Түркістан қаласына қатысты сөйлемдер құра.
5. Тайқазанға қатысты 5 деректі оқы. Есіңе сақта.
1) Бұл қазанды 1399 жылы Әмір Темір жасатып, Қожа Ахмет Ясауидің мазарына сыйлаған.
2) Тайқазанның салмағы – 2 тонна, сыйымдылығы – 3 мың литр.
3) Тайқазан жеті түрлі металдан жасалған. Оның қабырғасына араб әріптері қашалып жазылған.
4) 1935 жылы Тайқазанды Санк-Петербургтегі атақты мұражай – Эрмитажға алып кетеді.
5) Жарты ғасырдан астам уақыт өткен соң, 1989 жылы тарихи Отанына, құтты мекеніне қайтарылды.
6. Өлеңнен Тайқазан туралы айтылған шумақты тауып оқы.
7. Өлеңді жаттап ал.
8. Түркістанды шетелдік достарыңа таныстыру бағдарламасын жасаңдар. Қысқаша таныстырылым дайындаңдар.