Сәнгер болсам...
Сықақ өлеңдерді талдаймын және кейіпкерлердің іс-әрекетіне баға беремін.
1. «Киім кию мәдениеті» дегенді қалай түсінесің?
2. Түсініп оқы.
Модалар
Бірі – қаладан,
Бірі – даладан,
Екі жігіт
Театрда жүріп,
Таңданысты сырттай
Бір-біріне күліп.
Далалық сол шақ
Ойлады зер сап:
«Япыр-ай, ана
Жігітті қара.
Тал бойы сыптай,
Сымпиған бұтты-ай!
Шіркіннің басы-ай,
Дудыраған шашы-ай!
Әлде, әйел ме?
Ұқсамайды-ау, әй, ерге.
Жасаған тоба,
Бұл қандай мода?
Бәтеңкесінің табаны
Жарты метр шамалы.
Кәстөмі шұбар,
Әсті, алаша шығар.
Мойнына таққан
Қарғыбауды қайдан тапқан?
Ауылға барса,
Күлер ек қанша», –
Деп тұрған кезде,
Өзі де ілінді сөзге:
Қалалық
Қарады бір аларып.
«Мына жігіт қайдан келген?
Шамасы Айдан келген.
Бұтындағы шалбар ма?
Әлде дамбал ма?
Жарты метр далақтай
Жарасымсыз балақты-ай!
Қоқиған тымақ
Ерсі тым-ақ.
Үстіндегі жейде
Қап секілді бейне».
* * *
Осылайша модалар
Бірін-бірі сынады.
Әркім өзі жобалар,
Кімге не ұнады?
Абдырахман Асылбек
3. Автор туралы әңгімеле.
Абдырахман
Асылбек
1938–2018
- Абдырахман Асылбек сықақ өлеңдер де жазған.
- Ақынның әзіл-сықақ өлеңдер жинағы «Ұр, тоқпақ» деп аталады.
- «Абдырахман Асылбектің шығармалары балалар ұғымына лайықты жеңіл тілмен жазылған».
Тұманбай Молдағалиев
4. Кейіпкерлердің іс-әрекетіне көзқарасыңды білдір. Киіміне қарап, адамды ұнатпауға бола ма?
5. Оқы және әңгімеле.
Оспанхан Әубәкіров
1934–1986
Оспанхан Әубәкіров мамандығы актер болса да, өзінің шығармашылығын сатирамен байланыстырған.
6. Тыңда.
Әшекей қыз
Тақияға күміс қадап он шақты,
Жапсырыпты неше
Түрлі моншақты.
Жинап алып үйдегі
Бар жүзікті
Оны-дағы саусағына тізіпті.
Қалай ғана көтеріп
Жүр бір басы,
Құлағында –
Апасының сырғасы
Танаменен тұтасыпты.
Омырау,
Үсті-басы толып
Тұрған қоңырау.
Оспанхан Әубәкіров
7. Әшекей қыздың іс-әрекеті сенде қандай пікір (көңіл күй) туғызды?
8. «Мен дизайнермін» ойыны. Әр топ «Әшекей қызды» талғамға сай қалай киіндіретінін айтады.
1. театрда
2. қонақта
3. үйде
4. мектепте
5. спортта
Дизайнер дегенде, көбінесе сәнгерлерді, яғни айрықша киім үлгілерін ұсынатындарды айтамыз. Дизайн саласы көп: көгалдандыру, баспа т.б.