мүмкін емес еді. Сондықтан оны доғарып қойдық, пісіп-жетілгенде жазармыз дедік», – дейді. С. Елубай өзінің «Ақ боз үй» романында қазақ халқының басына түскен қасіретті жылдардың реалистік көріністерін береді.
  Жазушының «Ойсылқара», «Саттар соқпағы», «Білте шамның жарығы», «Жарық дүние» хикаялар жинағы және «Ақ боз үй», «Мінәжат», «Жалған дүние» романдары бар. «Қызыл отау», «Өтелмеген парыз», «Ай астындағы үй», «Сұрапыл Сұржекей», «Батыр Баян», «Кек» көркемсуретті фильмдер сценарийінің авторы.
  «Ақ боз үй», «Мінәжат» романдары ашаршылық, сталиндік қуғын-сүргін жылдарын қамтыса, трилогияның үшінші кітабы – «Жалған дүние» романы (2001) «тоқырау заманы» дейтін кезеңге арналған. «Құрмет» орденімен марапатталған.
  «Жалған дүние» романы – Смағұл Елубайдың «Ақ боз үй» трилогиясының үшінші кітабы. Трилогияға кеңестік кезеңдегі қазақ халқының жазылмаған шындығы, айтылмаған тарихы арқау болған. «Ақ боз үй» романына өткен ғасырдың 30-жылдарындағы ашаршылық зардаптары, «Мінәжат» романына қуғын-сүргін оқиғалары өзек болса, «Жалған дүние» 80-жылдардағы рухани тоқырау дәуірінен сыр шертеді. Роман-трилогияның басынан соңына дейін жүретін кейіпкер Хансұлудың өмір жолы арқылы барлық оқиға баяндалады. «Ақ боз үй» мен «Мінәжат» романдарында реалистік суреттер басым болса, «Жалған дүние» романында автор экзистенциалистік бейнелер арқылы өмірдің мәнін түсіндіреді.