Мен – табиғат бөбегі

Мәтінді талдаймын, салыстырамын, ақын ойын түсінемін.

1. Кімнің шығармасынан алынған үзінді? Ол туралы не білесің?

«Уа, дариға, алтын бесік туған жер,
Қадіріңді келсем білмей, кеше гөр!»

2. Мәнерлеп оқу үлгісіне назар аудар.

Мен – табиғат бөбегі

Мен – табиғат бөбегі,
Еркін жанмын, еркемін.
Аузымда жастық өлеңі,
Еркелеп күйім шертемін.

Жарқ-жұрқ етіп жүруді
Найзағайдан үйренгем.
Шадыман, шат боп күлуді
Күн мен Айдан үйренгем.

Тәкаппарлық, ерлікті
Асқар таудан үйренгем.
Мен бір жанмын ерікті
Жарысып желмен жүгірген.

Ашу, қайғы дегенді
Қара бұлттан үйрендім,
Өз еркімше сілтемей
Қашан ғана имендім?!

Қасым Аманжолов

3. Ақын ойын түсіндің бе? Өлеңнің тұжырымы ретінде қай жолдарды
атайсың?

4. Өлеңге сүйеніп, сәйкестендір.

ашу, қайғы

тәкаппарлық, ерлік

шадыман, шат күлкі

жарқ-жұрқ

5. Түсініп оқы.

Үйрену

Ұзын құйрық инелік,
Инелікке тимелік.
Тікұшақты жасадық,
Инеліктен үйреніп.

Суда жүзген балықты
Бақыладық байыпты.
Соған қарап жасадық,
Біз сүңгуір қайықты.

Ұзын мойын, сирақты
Білесіңдер жирафты.
Соған қарап ағалар
Крандарды жинапты.

Ақ құманның оттағы
Бүлкілдейді қақпағы.
Соған қарап белгілі
Паровозды тапқаны.

Бұлбұл үнін қаншалық,
Тыңдап жүрдік тамсанып.
Ақырында үйрендік,
Тамылжыта ән салып.

Аяз шебер суретші,
Салады әсем суретті.
Терезені оюлап,
Өрнектеуді үйретті.

Абдырахман Асылбек

6. Ақын ойын өз сөзіңмен түсіндір. Өз бетіңше жалғастырып айт.

7. Екі өлеңге ортақ бір тақырып ойластыр, түсіндір.

8. Суреттегілердің ерекшеліктерін ескере отырып, жаңа техника ойлап тап.

×
×

Корзина