ТҰРМЫСТЫҚ ЖАНР
1. Өзің білетін жанр түрлерін есіңе түсіріп, оларды ата.
2. Бейнелеу өнерінің жанрлары не нәрсеге арналғанын айт.
3. Сені қай жанр туындылары қызықтырады?
Суретшілерді әсем табиғат , әдемі заттар мен жануарлар әлемінен бөлек адамдар мен олардың кәсібі де қызықтырады.
Бейнелеу өнерінің тұрмыстық жанры адамдардың өмірі мен олардың күнделікті тіршілігін, қуанышы мен уайымын көрсетеді. Бұл жанр ертеде пайда болды, жартастарға салынған суреттерден адамдардың аңшылық кәсібін байқауға болады. Кейінірек суретшілер қандай да бір іс үстіндегі, әңгімелесіп тұрған адамдарды бейнелейді. Ежелгі египеттіктер пирамида қабырғаларын тұрмыстық бейнелермен өрнектеген. Қазір бұл картиналардың фрагменттері әлемнің ең ірі мұра жайларында сақтаулы. Тұрмыстық жанр ерте кезден суретшілердің жанына жақын. Әдетте аталған жанрда суретшілер өздерінің замандастарын бейнелеген. Тұрмыстық жанрды Жетісу өңірінде орналан Тамғалы петроглифтерінен де кездестіресің.
Ғаламтордан және тағы басқа дереккөздерден тұрмыстық жанр туралы мәліметтерді тауып оқы. Осы жанрда сурет салған суретшілер туралы толығырақ біліп, достарыңмен бөліс.
Адамдарды әр дәуірдегі тұрмыстық жанрда салынған туындылар еліктіреді. Өйткені онда көптеген қызықты нәрселерді көруге болады. Мына туындыларға мұқият қарап шығып, сұрақтарға жауап бер. Суретші тұрмыстық жанр туындысын бейнелей отырып нені жеткізеді ? Ертеде өмір сүрген адамдардың өмірі мен тұрмысы туралы не білдің?
О. Ренуар. Люксембург бағында
С. Айтбаев. Қонақ келді
Ә. Нақысбеков. Көш
