Жерұйық
Мәтін бойынша сұрақтарға жауап беремін. Мәтінді толықтырамын.
1. «Ғарыштан Жерге қарағанда қандай күй кештіңіз?» деген сұраққа Тоқтар Әубәкіровтің берген жауабын тыңда.
– Жердің өте сұлу екеніне көзім жетті. Оны бір сөзбен айтып жеткізу мүмкін емес. Ерекше таңғалдым. Тіпті ешбір суретші Жердің сол әсемдігін салып бере алмас. Ғарыштан Жерге қарағанда жүрегім дүрсілдеп, бүкіл Жерді құшақтағым келді. Жерге алыстан, сыртынан қарап тұрғанда Жерді аңсайсың. Анаңды сағынғандай сағынасың… Махаббат дегеннің не екенін сонда түсіндім. Ғарышкерлер қайтып оралғанда, Жерге жата қалып, топырақты сүйеді. Мен де сөйттім.
«Сақшы» газетінен
2. Түсініп оқы.
Жерұйық
Жер бетінде кез келген адамның көзіне көрінбейтін, құт дарыған бір жер бар дейді. Ол «Жерұйық» деп аталады. Жерұйықтағы барлық адамдар ауырмай-сырқамай, жүз жасайды. Мал жылына екі рет төлдейді. Елге жау қатер төндірмейді. Рақымсыз жұт болмайды.
Айнала төңіректе түгел шүйгін де шалғын көгорай шөп жайқалып, тап-таза тұнық өзендер ағады, көгілдір көлдерінде қисапсыз балық тіршілік етеді.
Адамдар қайғы мен жауласуды білмейді, қамсыз-мұңсыз өмір кешеді, не ішемін, не жеймін демейді.
Ол жердегілердің бәрі тең, бәрі бақытты, бәрі дос. Халықтар өзара соғысып, қырқыспайды, тату-тәтті тұрады. Қой үстіне бозторғай ұя салады.
Тек бұл жерге жету – қиынның қиыны. Ұзақ әрі қиын сапарға жылдар бойы дайындалу керек.
Жерұйықтың жолы шөл далалардан, таулар мен теңіздерден өтеді дейді. Тек бақыт жолындағы күрестің не екенін білетін, барлық сындарға төтеп бере алатын халық қана осынау елде өзінің ордасын орната алмақ.
Бірақ мұндай жердің қайда екенін ешкім білмейді…
«Қазақ ертегілері» кітабынан
берекелі бай мекен.
тыныштық, бейбіт заман.
3. Мәтінге сүйене отырып, сипаттап айт.
4. Жерұйықты сипаттауда қолданылған көркемсөздерді теріп жаз.
5. Мәтінді толықтыр. Жерұйықтың сипатына сен не қосасың?
6. Мәтіннің соңғы сөйлемін қайталап оқы. Мүмкін, ол жердің қайда екенін сен білерсің? Жоғарыда Т. Әубәкіровтің пікіріне сүйеніп жауап беруіңе болады.
7. Болашақта туған өлкеңді Жерұйыққа айналдыру үшін не істер едің?