КОМПОЗИЦИЯНЫҢ БАСТЫ БӨЛІГІ
Сен ғаламтордан және фотоальбомдағы қалалардың суреттерін көре отырып, кез келген сәулет кешенінде архитектуралық композицияның орталығы болып саналатын басты ғимарат болатынына назар аударған шығарсың. Экспо-2017 көрмесінде басты ғимарат «Нұр Әлем» болды.
Басты бөлік адамның назарын өзіне аударып қана қоймайды, сондай-ақ композицияны біртұтас етіп көрсетеді. Болашақ композицияны жасау барысында басты нысанды көрсету сәулетшінің ғана емес, суретшінің де міндеті. Суретші бірнеше фигуралы композиция жасағанда олардың қайсысы басты болатынын, оны ерекшелеп көрсету жолдарын іздейді.
Сен ерекше жұмыстар жасау үшін композициядағы басты бөлікті көрсету тәсілін меңгеруің тиіс. Сонымен қатар үйренгенің қала жобасын жасауға көмектеседі.
«Нұр Әлем» басқа құрылыстардың ішінде несімен ерекшеленіп тұр?
ЖҰМЫСТЫҢ ЖАСАЛУ РЕТІ
1. Қағаздан 20х20 см болатын екі шаршы және өлшемі бірдей бірнеше дөңгелек қиып ал.
2. Шаршыларға дөңгелектерді бірдей етіп орналастырып, композицияға қара. Қандай да бір дөңгелекті ерекшелей аласың ба?
3. Дөңгелектің бірін алып тастап, оның орнына өлшемі үлкен дөңгелекті қой. Сен бірінші кезекте қай дөңгелекке назар аударасың? Үлкен дөңгелек композициядағы басты бөлік деп айтуға бола ма? Қорытынды жаса.
4. Үлкен дөңгелекті алып тастап, оның орнына басқа түсті дөңгелекті қой. Бірінші және үшінші композицияларды салыстыр. Дөңгелек қай композицияда айрықша көрінеді? Қызыл дөңгелек композициядағы басты бөлік деп айтуға бола ма? Екінші қорыты ндыны жаса.
5. Қызыл дөңгелекті алып тастап, оны орнына басқа пішінді қой. Мысалы , үшбұры шты. Бірінші және төртінші композицияны салыстыр. Ең алдымен не нәрсеге назар аударасың? Үшбұрыш композициядағы басты бөлік деп айтуға бола ма? Үшінші қорытындыны жаса. Композициядағы басты бөлікті қандай тәсілмен көрсетуге болатыны туралы жалпы қорытынды шығар.
Суретшілер көбінесе басты бөлікті айқындап көрсету үшін бір мезгілде бірнеше тәсіл қолданады. Мына композицияларға қарап, суретші басты нәрсені көрсету үшін қандай тәсілдерді біріктіргенін анықта.