Астана қаласының Бас жоспары – Астана қаласы тіршілік-тынысының қолайлы ортасын құру және оны орнықты дамыту, экологиялық қауіпсіздігін, табиғи және мәдени мұраларын сақтау мақсатында жасалған қаланың сәулет-құрылыс жоспары. Бұл жоба Қазақстанның Президенті Нұрсұлтан Назарбаевтың қолдауымен іске асып жатыр. «Астана қаласының Бас жоспарын» жасауға халықаралық байқау жарияланып, байқау нәтижесінде жапон сәулетшісі Кишо Курокаваның арнайы жасаған жобасы қабылданды. Осы жобаның ішіндегі өте құнды сәулет туындысы – Қазақстанның Ұлттық музейі.
   Жалпы көлемі 74 мың шаршы метрден асатын Ұлттық музейге Қазақстанның ерте ғасырдан бүгінгі күнге дейінгі археологиялық, этнографиялық жәдігерлері мен мәдени ескерткіштері жинақталған. Ұлттық музейдің экспозициялық кешендерінде Астана, Тәуелсіз Қазақстан, Алтын, Ежелгі және ортағасыр тарихы, Этнография, Тарих, Заманауи өнер залдары бар. Мұражай халықаралық стандарттарға сай жабдықтармен жарақтандырылған.
   Экспозициялар үшін заманауи көрме технологиялары: бірегей иілгіш экран, медиа-еден, қазіргі Астананың серпінді макеті, голограммалар, диодты жарығы бар LED-техника, сенсорлы дүңгіршектер, мультимедиалық жолсерік және т.б. қолданылады. Жеті залда ұсынылатын негізгі экспозициялардан бөлек көрмелерде ашылды: Қазақстан Республикасы қолөнершілерінің жәрмеңкесі, «ХІХ–ХХ ғасырлар тоғысындағы қазақтар» мұрағат суреттерінің көрмесі, Венгрия суретшісі Джудит Покс пен Ресей суретшісі Яна Волкованың киізден жасаған жұмыстарының фотокөрмесі, ҚР еңбек сіңірген өнер қайраткері Сәуле Бапанованың «Сейхун толқындары» атты киізден жасалған киімдерінің жиынтығының көрсетілімі.
   Баспасөз мәжілісі барысында шетелдік қонақтардың бірі Джон Симпсон: «Лондондағы Британ музейінің тәлімгері ретінде осындай іс-шараға қатысу мен үшін зор құрмет және қуаныш. Музей – мәдениет белгісі, зерттеулер жасау мен білім алу үшін үлкен мүмкіндік берер, халықаралық ынтымақтастыққа үлкен үлес қосар орталық. Музей құрылысының дизайны – кісі таңғаларлықтай, өте маңызды заманауи ғимарат. Бұдан басқа, көне экспонаттарды мультимедиалық технологиялар арқылы көрсетудің жаңа тәсілдерін қолдану – заманауи жетістік», – деді.
   Ұлттық музейге 17.30–22.00 аралығында баруға болады. Келушілер үшін «Ұлы Жібек жолымен саяхат» атты мерекелік бағдарлама ұйымдастырылады, оның ішіне төмендегілер кіреді:
  – Түркістан, Сауран, Испиджаб, Тараз, Сығанақ, Ақмешіт,Отырар, Суяб сияқты Жібек жолы өткен Қазақстандағы ортағасырлық қалаларға бөлінеді;
  – суретшілер мен қолөнер шеберлерінің шеберлік-сыныптары,
  – сәндік-қолданбалы өнер жәрмеңкесі;
  – суретшілердің аспан астында сурет салуы, ұлттық киім үлгісімен суретке түсу;
  – балаларға арналған интерактивті ойын бағдарламасы, балаларға арналған интерактивті алаң, музей викторинасы;
  – ұлттық ойындар, ұлттық тағамдар мен сусындардан дәм тату;
  – домбырашылар кеші.

(«Астана ақшамы» газетінен)