Есілдің сол жағалауында орналасқан «Астана Опера» театры асқақ сән-салтанатымен көз тартады. Ғимараттың жалпы ауданы – 64 мың шаршы метр. Оның 3000 шаршы метрін сахна аумағы алып жатыр. «Астана Опера» өзінің көлемімен ғана емес, сонымен қатар әсем сәулетімен де таңғалдырады. Әлемдік сәулет өнерінің ең үздік классикалық дәстүрлері ескеріле салынған театр сәулетінде ұлттық нақыш айқын байқалады. Театр ғимараты палладиандық, неоклассикалық сәулет стильдерінде салынған. Ғимаратта барлық спектакль мен концертті жазып алуға мүмкіндік туғызатын студиялық жабдықтау орналасқан, театрдың жеке спутник стансасы бар.
   Едендегі паркет, қабырғалардағы шие ағашынан жасалған панель, кресло мен айналардың барлығы акустикалық тұрғыдан ескеріліп орналасқан. Креслолардың еңкею және бұрылу бұрыштары миландық «Ла Скала» театрының үлгісімен жасалған. Театрдың Үлкен залы 1250 орынға есептелген, ал Камералық зал 250 адамға арналған.
   2013 жылдың 21 маусымында театр өзінің алғашқы маусымын М. Төлебаевтың атақты туындысы – «Біржан–Сара» операсымен салтанатты түрде ашты. Сол жылдың күзінде театр әлемдік тұсаукесерін өткізіп, Пьер Луиджи Пицци қойылымындағы Дж. Вердидің «Аттила» операсымен халықаралық қауымдастыққа таныстырылды.
   Қазір театр репертуарында А. Жұбанов пен Л. Хамидидің «Абай», Е. Брусиловскийдің «Қыз Жібек», Ж. Бизенің «Кармен», Дж. Пуччинидің «Тоска», «Богема», «Мадам Баттерфляй», Дж. Вердидің «Аида», «Травиата» опералары, С. Прокофьевтің «Ромео мен Джульетта», Б. Асафьевтің «Бақшасарай бұрқағы», Л. Минкустың «Баядерка», «Дон Кихот», М. Жаррдың «Париж Құдай Ана соборы», П. Чайковскийдің «Ұйқыдағы ару», «Аққу көлі», «Щелкунчик» балеттері бар.
   Театр репертуары жыл сайын ұлттық және әлемдік опера мен балеттің үздік туындыларымен толыға түсуде.

(«Екпін» мәдени-танымдық журналынан)